कोरियामा मनोज गजुरेलको बिषयबस्तु भारतले गरेको बुद्धको जन्मस्थलबारे भ्रम

Posted by Ram Kumar Shrestha on February 4, 2012

 नेता राजा र राजनीतिले सिर्जना गरेका अनेक विकृतिलाई व्यंग्यको निसाना बनाउन खप्पिस लुम्बिनी-कपिलवस्तु दिवस अभियानका सांस्कृतिक दूत मनोजले यसपालि भने भारतले गरेको भगवान गौतम बुद्धको जन्मस्थलबारे भ्रमलाई विषय बनाएका थिए रामदेव बनेर ।

सोल -दक्षिण कोरिया, माघ १५ –  कोरियाली नयाँ वर्ष -सलनाल) को दिन यहाँ सर्वाधिक चिसो हुन्छ । परदेश पसेका नेपालीहरू भने भेटघाट र आत्मीयताको तातोमा रमाइरहेका छन् । जब गत शनिबार कोरियाली सञ्चारमाध्यमहरूले लुनार वर्ष मनाउन सोल क्षेत्रमा कार्यरत लाखौं कोरियालीहरू गाउँ र्फकदै छन् भनेर ट्राफिक जामसहितको समाचार प्रसारण गरिरहेका थिए, दशैताका काठमाडौं रित्तो भएजस्तै सोलमा पनि देखियो । यही मौकालाई नेपालीले भने आफ्नै देशका कला, संस्कृति र गीतसंगीतको मज्जा लिने अवसरका रूपमा सदुपयोग गरे । तुङदेमुन र यङदम्फोजस्ता क्षेत्र त मिनी नेपाल नै बने ।

आइतबार र सोमबार माइनस १२ डिग्रीको चिसो तापक्रम भए पनि तुङदेमुनमा रहेको मेट्रो रेलको ३ नं गेटमा नेपालीको भीड त्यतिकै थियो । तिनै नेपालीहरू कोरियाली नयाँ वर्ष सलनालको दुईदिने बिदामा आयोजना गरिएका सांस्कृतिक कार्यक्रमहरूमा दुःख, पीडा भुलेर नाचिरहेका थिए, हाँसिरहेका थिए ।

आइतबार सोङबुक कुक्मिन हलमा नेपालीको ढिलो गर्ने बानीमाथि व्यङग्य पस्किँदै हास्यकलाकार दीपकराज गीरी देखापरेपछि गोर्खा परिवारले आयोजना गरेको मनास्लु सांगीतिक सौगातमा रौनक थपिएको थियो । उनले कार्यक्रम अवधिभर नेता, गायक, मायाप्रेमजस्ता अनेक विषयका विकृतिलाई समेटेर प्रहसनहरू देखाए । लोकगायक पशुपति शर्माले पनि दर्शकलाई गीत गएर जति सन्तुष्टि दिए त्यति नै चुटकला र सामाजिक व्यंग्य प्रस्तुत गरेर मन जिते । लोक गायिका राधिका हमालले गीत गाउँदागाउँदै ‘सलल सलल…’ भन्दै आफू पनि हाँसिन् र दर्शकलाई पनि हँसाइन् । त्यो हाँसोमा हराइरहेका दर्शक गायक चौबन्दी सुब्बाले भक्तराज आचार्यको गीत ‘जहाँ छन् बुद्धका आँखा’ गाएपछि भावुक बनेका थिए । देशविदेशमा कार्यक्रम चलाउँदाचलाउँदै पोख्त भएका गिरीले दर्शकहरूको बढ्ता भावुकता बुझेरै नृत्यकार पूण्ािर्मा श्रेष्ठलाई बोलाएर फेरि दर्शकलाई नचाए- तिर्खा लाग्यो पानी खाएँ मैले के बिराएँ…।’

कार्यक्रमको मध्यतिर उद्घोषक गिरीले गायक र नायक प्रशान्त तामाङलाई बोलाए, दर्शकको ताली बेजोड बज्यो तर त्यहाँ प्रशान्त माइक्रोफोन बोकेर मन्द मुस्कान छर्दै आएनन् । बरु स्टेजको बीच पर्दा बिस्तारै खुल्यो, जहाँ गहभरि आँसु पारेर प्रशान्त भिडियोमा बोलिरहेका थिए, माफ मागिरहेका थिए, जहाजको उडान तालिका नमिलेका कारण आफू उपस्थित हुन नसकेको बताइरहेका थिए उनी । उनले फ्यानहरूलाई भेट्न चाँडै कोरिया आउने वाचा गरे । प्रशान्तको बाध्यता सुनेर दर्शकहरू स्तब्ध बनिरहेका बेला गिरीले प्रशान्त नआउनुको वास्तविकता फुकाउँदै भने, ‘उहाँले जे भन्नुभए पनि भिसाको कारण्ा हो । सम्पन्न मुलुकले हामी दक्षिण एसियाली कलाकारलाई घटिया दर्जामा हेर्ने गर्छ । मैलै पनि जर्मनीको एउटा कार्यक्रममा यस्तै धोका पाएको छु ।’ गिरीको गुनासो सुनिरहेका दर्शकले कार्यक्रम आयोजकसँग कुनै गुनासो गरेनन् बरु कलाकारहरूप्रति सहानुभूति जनाए ।

कार्यक्रमको उत्कर्ष बन्यो लोकगायक पशुपति शर्मा र गायिका राधिका हमालको ‘क्याम्पस पढ्न आउने, सरले उता पढाउने, हाम्ले आँखा जुधाउने, चित्त बुझाउने’ लोक दोहोरीमा पूण्ािर्मा श्रेष्ठलगायत अन्य कलाकारको नृत्य । यो दोहोरीसँगै सबैजना नृत्यमग्न थिए ।

आइतबार कम्मर मर्काउनेहरू उही जोस र जाँगरमा मेट्रो टे्रनबाट सजिलै पुग्न सकिने सोलको हुकसक दोङस्थित वोन बुल्ग्यो हेग्वानमा पनि भेटिए । मुस्ताङ परिवारले आयोजना गरेको सांगीतिक सौगातमा सुरुमै लोक गायिका सुनिता दुलालको कार्यक्रम प्रस्तुतिले अल्लारे ठिटाहरू मख्ख थिए । तिनै ठिटाहरू स्थानीय गायक भारत गुरुङ र अशोक थुलुङका स्वरहरूमा मात्र होइन, स्थानीय टि्रनिटी ब्यान्डको रक प्रस्तुतिमा पनि चिच्याइरहेका थिए ।

पप र रकपछि कार्यक्रम प्रस्तोता दुलालले लामो भूमिकासहित नायिका सौजन्या सुब्बालाई निम्त्याइन् स्टेजमा । नेपाली पारामा उनले दर्शकलाई नचाइन् अनि घमेश दुलाललाई बोलाइन् र नेपालको पूर्वदेखि पश्चिमसम्मको भन्ज्याङ र चौतारीका सन्दर्भ झिक्दै दर्शकलाई भावुक पनि बनाइन् । कार्यक्रमको मियो मानिएका मनोजलाई बोलाएर उनी नेपथ्यमा गइन् । मञ्चमा मनोजलाई देखेर दर्शकहरू हाँस्न थाले । कोरियामा मनोजका प्रस्तुतिहरूको खुब चर्चा हुने गर्छ । त्यसैले उनलाई बोलाउन आयोजकहरूबीच निकै प्रतिस्पर्धा हुने गर्छ । यसचोटिको कोरिया यात्रा उनको आठौं थियो । उनी बाह्रौंपल्टमा कोरिया यात्रा टुंग्याउन चाहन्छन् । नेता राजा र राजनीतिले सिर्जना गरेका अनेक विकृतिलाई व्यंग्यको निसाना बनाउन खप्पिस लुम्बिनी-कपिलवस्तु दिवस अभियानका सांस्कृतिक दूत मनोजले यसपालि भने भारतले गरेको भगवान गौतम बुद्धको जन्मस्थलबारे भ्रमलाई विषय बनाएका थिए रामदेव बनेर ।

कार्यक्रममा धेरै दर्शकको आकर्षण बने राजु लामा । उनले राष्ट्रिय भावनाले ओतप्रोत ‘मेरो नेपाल’ चर्चित गीतहरू गाउन भ्याए ।

प्रकाशित मिति: २०६८ माघ १६ ०९:३२

नयाँ वर्षमा नेपाली रमझम | कला र शैली | :: कान्तिपुर ::.